Aliyekuwa Kocha Mkuu na Mkurugenzi wa Ufundi wa Yanga, Mholanzi, Hans van Der Pluijm, amesema atashangaa akiona mshambuliaji Mzimbabwe, Donald Ngoma anasaini Simba badala ya kwenda kucheza soka la ushindani Afrika Kusini.
Pluijm amesema Ngoma ana ofa nyingi za kwenda kucheza soka Afrika Kusini, hivyo anashangaa kusikia mshambuliaji huyo anakuja kuichezea Simba msimu ujao.
Pluijm amefunguka kwamba atashangaa kwa kiwango chake alichonacho akiendelea kubaki kucheza soka nchini Tanzania.
"Hivi ni kweli Ngoma anakuja kusaini Simba? Kama ni kweli sidhani kama ni sawasawa, lakini nangojea tuone, mimi nachojua ana ofa nyingi amezipata nchi mbalimbali kati ya hizo ni Afrika Kusini.
"Kwa uwezo na aina yake ya uchezaji, anastahili kucheza soka huko kwani Ligi Kuu ya Afrika Kusini inahitaji wachezaji wa aina ya Ngoma.
"Soka la Afrika Kusini ni la kasi na ushindani, pia inahitaji mchezaji mwenye stamina, pumzi na nguvu za kutosha za kupambana na mabeki hatari," alisema Pluijm ambaye kwa sasa anainoa Singida United.
#WataniBongo
